– लक्ष्मण संगम

(१)
जीवनमा एउटा यस्तो चमत्कार गर्ने मन छ
आगो बोकेर मटितेलको नदी पार गर्ने मन छ

रगत पिउनेहरूको बस्तीबाट बचेर आएको छु
फेरि तिमी भन्छौ रगतले शृङ्गार गर्ने मन छ

जहाँ सजिलै हुने गर्छ मान्छेहरूको व्यापार
मलाई ती बजारहरूको व्यापार गर्न मन छ

सबथोक लेखिएको तिम्रो नाम नलेखिएको
मेरो निधार त त्यसलाई केरकार गर्ने मन छ

दुबै हात काटेर कसैलाई नसोध्नु अन्तिम इच्छा
उसले भनिदिन सक्छ सबैलाई नमस्कार गर्ने मन छ

(२)
बगिरहने हो भने अहिले जसरी
आँसुले बगाउँछ बाढीले जसरी

राख भन्छौ आफ्नाको सूचीमा
मद्धत गर्छौ छिमेकीले जसरी

आँखा र चस्मा परिपूरक हुन्
तर बसिरहेछन् नमिले जसरी

प्रेमपत्र बोकेर खुब हिँडिन्थ्यो
एक समय हुलाकीले जसरी

जिन्दगीले पनि धोका दिएन
धोका दिएथ्यौ तिमीले जसरी

***